Bret pitt
Ayni paytda mamlakatimizning ko‘pgina kinoteatrlarida Hollivud kinoijodkorlari tomonidan suratga olingan «Janob Smit va Smit xonim» filmi namoyish qilinayotganidan xabaringiz bor, albatta. Ushbu film ancha-muncha kassabopligi sabab, ko‘pgina kinoteatrlar iloji boricha barcha seanslarda «Janob Smit va Smit xonim»ni qo‘yish bilan band. Xo‘sh, filmning oshig‘i olchi bo‘lishiga sabab nima? Aktyorlarning mahoratimi yoki yana boshqa sabablar mavjudmi? Agar filmni tomosha qilgan bo‘lsangiz, bosh rollarni ijro etgan Hollivud yulduzlari Bred Pitt va Anjelina Jolining san’atiga tasannolar aytishingiz turgan gap. Gapning indallosini aytadigan bo‘lsak, ana shu film qahramonlaridan biri Bred Pitt bizning bugungi mehmonimiz Bredning asl ismi Uilyam Bredlidir. U 1963 yilning 18 dekabrida AKShning Oklaxoma shtatidagi Shouni shaharchasida tug‘ilgan. Otasi Bill Pitt, onasi Jeyn Pitt. Xullas, Uilyamning hayoti misli bir tarixiy ertak. Unaqada boshladik. Bir bor ekan, bir yo‘q ekan...

Missuri shtatidagi Springfildning hududida Pittlarnikidan durustroq va zerikarli oila bo‘lmagan.

Bill Pitt — yuk tashish bo‘yicha kichik menejer, 36 yillik xizmat faoliyatida biror marotaba ishga kech qolmagan, kasal bo‘lmagan va maoshini oshirish to‘g‘risida iltimos ham qilmagan. Onasi — Jeyn Pitt esa yosh ota-onalarga pedagogika asoslaridan dars bergan, ko‘p yillar davomida bolalardagi individuallikni o‘z vaqtida ilg‘ay bilish zarurati haqida va uni rivojlantirishni yodaki tinmay so‘zlardi. Har holda uning o‘g‘illarida yorqin individuallikdan hech vaqo yo‘q edi. Ammo o‘g‘li Dag haqiqatan ham kunlarning birida ko‘zini ko‘kartirib   kelgan,   qizi   Juliyani   esa   o‘n   ikki   yoshidayoq   maktab hovlisida sinfdoshi bilan o‘pishib turganini payqab qolgan. Katta o‘g‘li Uilyam Bredlining ishlari yaxshi emasdi. Uning o‘ta chiroyli va maftunkorligidan boshqa biror aytadigan jihati yo‘q edi. Ko‘k ko‘zli Uilyam kun bo‘yi xonadan-xonaga sudralib, televizordan ko‘zini uzmas, biror qiziqroq ko‘rsatuvni ko‘rish uchun televizor murvatini burashga ham erinardi.

Bredli o‘qishni tamomlagach, Missuri universitetining jurnalistika va reklama ishi fakultetiga o‘qishga kirdi. Ammo diplom qo‘liga tegmaydi, o‘rniga u aktyorlik pillapoyasini zabt etish maqsadida Hollivudga yo‘l oladi. Kissasidagi 325 dollar bilan Los-Anjelesga yetib kelgach, Pitt shunday xulosaga keladi. «Bundan keyin Uilyam Bredli nomi bilan mashhur bo‘lish qiyin». Ana shunday qilib u o‘z ismini bizga hozirda tanish bo‘lgan «Bred Pitt»ga almashtiradi. Ammo bu o‘zgarish bilan unga taklif qilinadigan rollar soni ortmas edi. Shuning uchun Bred shou-biznesdan yiroq bo‘lgan yumushlar bilan shug‘ullanishga majbur bo‘ldi: u mahalliy restoranda xo‘randalarni chorlovchi vazifasida ishlagan, buning uchun u kattagina jo‘ja kostyumini kiyib olib, yo‘lovchilarni tashrif buyurishlari uchun astoydil harakat qilardi. Ishdan bo‘sh vaqtlari chiroyligina basharasiga professionallik ato etish maqsadida u aktyorlik kursiga ham qatnadi. 
Joyladi: Banka Qaroqchi | Vaqti: 16 Aprel 2018, 13:33 | O`qilgan: 525 | Izohlar (0)